Son nyt niin, että ei kannatte panna käsijarrua pääle ko on päässy poronhoitoaluehelle. Sullon tulolhan semmosta haipakkaa, että siittä ei taho selvitä itte vallesmannikhan. Aurinko paistaa ja leveälahkheiset käypi kimphun ninkö sääsket vittikossa. Viimisthän torstaina saattas olla hyä vilkasta olkansa yli ja kokkeila lähteekö muukki matkhan. Lomasta jääpi käristyksen maku suuhun ja se mennee komeasti ko Härkä-Arviitin tokka tunturissa.
Ei kannatte hötkyilä vaikka päntiönhän tulleeki viestiä, että sinua tarvithan muuala. Muista, että solet Ylläksellä, ekkä käytettävissä vaikka puoli Suomea huutas apua. Alkuviikon värikylläset venkuloinit saapi tarttumhan viheliäisen suuhrin saaphaishin ja sillon näyttäs, että lumi lentää eikä riitasoinuiltakhan vältytä. Iltahumppa näkkyy kaloila sujuvan ninkö ennenki, elikkä jouhevasti kompuroimala.
Paljon on virranu vettä Äkäsjoessa sen jälkhin, ko solet viimeksi tuomosta lommaa pitäny. Papanat osottaa, ette oinas tekkee viishasti, ko pittää suun supussa ja löylykauhan käessä. Yhentoista aikhoin kannattee olla varma asiasta ja kattoa viiminenki kortti – sitä tiä vaikka pääsis saatile. Naispuolisilla oihnaila on nytten päätettävänä, kumman ottaa, Lynxin vaiko Okkelin?
Kipakka pakkanen pannee posket hehkumhan ja sukat pyörimhän siihen malhin, että granniki luulee sinun juohnen liika paljo sokkerdrikkaa. Yhellainen ”Kaapelitehthan kappalainen” antaa hyän merkin puolesta viikkoa ja sitä kannattee nouvattaa. Perjantai-iltana tuntuu jotaki hienompaa olevan persusten alla ja niinhän sonki ko sie ja sinun kamraatti painatta parkkarilla Ylläs Avvainta kohen.
Huojuu ja heiluu, mutta eipä kuiten kaavu. Alkupääomala se näkkyy kaksostenki touhu pyörivän ja hyä niin. Nytten ei ole varraa riskinothon eikä kannatte panna viimistä likhon. Muistappa, että torikokkouksia tullee ja mennee, eikä sinun kannatte huuela tyhjää – muuten saattaa hukka periä ja karhu viä. Solet sen luontonen, ette saatat mennä pirthiin porisemhaan millon joutilasta aikaa on.
Nyt on semmosta ilmassa, ette sie tykkäät mahottomasti käyä sakila hoilaamassa ja sehän vain passaa. Yhellainen väärinkäsitys on kuitekki maanantaina tulolhan, mutta sie otat ja käänytät sen poies, ennenkö kerkiää tulla mithän vakavampaa. Hollaaminen pakkaa käyhmän välhin aisojen pääle, mutta niinhän son aina pruukanu tehä. Ko on lomale lähteny, niin lommailusta otethan kaikki irti ja rapupa sen ossaa.
Melkonen rantu vierelä ja tokka pitkin mettiä. Siinäpä alkuviikon lähtökohat, joista ponnistaa. Leijonalla on isomman saahlin haukkaaminen mielessä ja sen tähen onki hyä ottaa kuljetukshen kunnon lääppi, eikä se renkikhän pahitheksi olis. Kipupisthet antavat aihetta kaiken kattavalle hunteeraamiselle, mikä ei tieten ole huono asia ollenkhan. Jo vain, on lomassa pittuutta, eikä se levveyskhän niin kapealta näytä.
Neitsyelä on nytten ilmassa tunthellista meininkiä, mikä ei sinälhän olekhan kumma: son vuorovaikutusviikko menossa. Sie houkka pölkäät, että ei onnistu, mutta tieten se onnistuu, ko hunteeraat lujhan ja verestät vanhoja asioita. Sen verran tuulee sisäläki, että kalvosvanthuut olisit paikalhan. Tuttu rapu silmii vähäsen vihasesti, mutta kyllä se lauhtuu ko isket sille vaktat pöythän ja tarjoat gevalikupilisen nisun kansa.
Sie melkutat kahvia välhin liiasti, mikä pannee tuttuaki tutuman kamraatin hunteeraahman vistoja asioita, elikkä siinon opin paikka. Sivakat huilaavat entishen malhin ja sen tähen on eppäilys, että taiat päässä palkinoile. Lopusta viikkoa tulleeki semmonen kuorma ”pokaalia”, että sole poka tosikhan. Son juuriki fiini hoito ja sen tähen tullee präpsähytettyä joku öölipurkkiki – tieten vain saunajuomaksi.
Äläskö nyt vain, että et olis yhtä hyä ko lähtiessästi – kyllä siittä on suljuaminen kaukana, ko sie hyppäät kärröle. Loma on soma ja tunturin toisela puolela näkkyy sitä valoa, jota sie tarvittet. Muistappa olla pirskottamatta vettä joka paikhan, piisaa ko viskot kiukhale, muuten joutuu vinttaahman yhtenhän. Torstaile on tiossa fiiniä ruokaa Pihvikeisarissa ja perjantaina tieten sitte pakathan. Solet ihmisenä semmonen, että et orjaile mithän ja hyä niin.
Alkuviikosta on luvassa komea konsäri ja sen tähen kannattee olla täheliset kamphet päälä. Sie piät jöötä niin lujhan, että välhin kannattas höllätä, ettei lastut lennähä silmile. Jousimiehen kannattee kötöstää kunnola ryysyjä päälensä, että ei jouvu tyhjää rykhin. Sie havattet loppujaksosta jonku koppuran kappalhen ja panet sen visusti talthen. Kappasti vain, siittä tullee matkamuisto, jonka arvo kasuaa ko heinä pellossa.
Kläpit pakkaavat kisuamhan ja sie panet sen tähen melkhen pönkän oven ethen. Kaalilaatikon laitossa sulla on periaathena, että mörkkyä siirappia häätyy olla reilusti. Revontulitten kattominen saapi sinut tuumaahman luonon tiskoteekin olevan rohki komean. Piipusta punnoo semmoset sauhut ko olis ÄVPK:n paikka, mutta eipä sole mikhän muu ko kärty pakkanen pannee lämmittämhän lujhan. Sie tykkäät enämpi leetasta ko korvapuustista.
Retkivinkit Katso mihin Ylläksellä ja lähistöllä kannatta suunnata retkeilemään. Parhaat vinkit ja ohjeet jokaiselle vuodenajalle
Näytä lisää
Ylläksen palvelut Katso miltä palveluita Ylläksellä on auki tällä hetkellä, hae palveluita sijainnin mukaan
Ylläksen retkivinkit Katso mihin Ylläksellä ja lähistöllä kannatta suunnata retkeilemään. Parhaat vinkit ja ohjeet jokaiselle vuodenajalle
Ylläksen bussiyhteydet Katso lentokenttäbussien, junabussien ja skibussinaikataulut kätevästi Kuukkelista.
Ylläksen sää Katso sääennuste tälle päivälle tai tulevalle viikolle kätevästi Kuukkelin sivuilta ja lue samalla lisää artikkeleita Ylläksen säästä.